Boşanma səbəbləri hansılardır? İnsanlar niyə boşanır?

Boşanmalar çoxalır. Bu vəziyyətdə cəmiyyəti düşündürən əsas suallardan biri boşanmaya aparan səbəblərin hansılar olmasıdır: 

Boşanmaya aparan səbəblər:

• Ünsiyyət problemləri(Doğru mübahisə etməyi və doğru barışmağı bacarmamaq)
• 3-cü tərəflərin təsiri
• Partnyoru olduğu kimi qəbullana bilməmək, dəyişməyə çalışmaq
• Hədsiz gözləntilər
• İntim uyğunsuzluq
• Xarakter fərqlilikləri
• Zorakılıq
• Maddi problemlər
• Hisslərin keçməsi, emosional uzaqlaşma
• Həyat və ailə vizyonlarının üst-üstə düşməməsi, bir komanda olmağı bacarmamaq, birlikdəlik barədə fikirayrılığı 
• Mənəvi və maddi dəstəyin olmaması
• Gözdəndüşmə
• Sürətli çözüm yolu axtarmaq; münasibətdəki problemlərin üzərində işləmək istəməmək
• Pis vərdişlər və asılılıqlar

Evliliklə bağlı bir çox miflər mövcuddur. Bu miflərdən biri boşanmaya əsasən xəyanətlərin səbəb olmasıdır. Dünya statistikası göstərir ki, evlilikdən kənar münasibət-xəyanət boşanmaların yalnız 25%-30%-nə səbəb olur. Azərbaycanda isə bu faiz göstəricisi cəmi 16%-dir.

Evliliklərin 50%-nin boşanma ilə nəticləndiyi ABŞ-da ünsiyyət problemləri 67.5% halda əsas boşanma səbəbi olaraq göstərilir. Təcrübəm göstərir ki, Azərbaycanda əsas boşanma səbəbi zorakılıqdır.

Dünya üzrə boşanma səbəbləri araşdırılan ən güvəniləbilir mənbə 1992-ci ildə Lin Qiqi və Con Keli tərəfindən "Kaliforniya boşanma mediasiyası" layihəsi çərçivəsində nəşr olunmuş elmi araşdırmadır. Bu araşdırmaya görə 80% kişi və qadın iştirakçı boşanma üçün əsas səbəb kimi tərəflərin tədricən bir-birindən uzaqlaşmasını, yaxınlıq hissinin itməsini, sevildiyini, dəyər verildiyini və hörmət olunduğunu hiss etməməsini göstərmişdir. Xəyanət boşanma üçün səbəb olaraq yalnız 20-27% sorğu iştirakçısı təfindən göstərilmişdir. Şiddətli və sıx davalar 35% kişi, 44% qadın iştirakçı tərəfindən boşanma səbəbi kimi göstərilmişdir. Qısacası, birlikdə ikən bir-birindən uzaqlaşmaq, fərqli istiqamətlərdə böyümək, doğru ünsiyyət qura bilməmək və ailədə zorakılıq xəyanətdən daha böyük diqqət tələb edən boşanma səbəbləridir.